У рабоце форума прынялі ўдзел больш за 70 вядомых беларускіх навукоўцаў, а таксама даследчыкі з Украіны і Польшчы. Усіх заяўленых дакладчыкаў было каля 90. Удзельнікаў канферэнцыі на ўрачыстым адкрыцці вітаў галоўны вучоны сакратар Нацыянальнай Акадэміі навук, акадэмік А.У. Кільчэўскі, які падкрэсліў важнасць і значнасць мерапрыемства. З прывітальным словам да ўдзельнікаў і гасцей канферэнцыі выступілі таксама акадэмік НАН Беларусі, дырэктар Цэнтра даследаванняў беларускай культуры, мовы і літаратуры НАН Беларусі А.І. Лакотка, дырэктар Інстытута літаратуразнаўства імя Янкі Купалы, доктар філалагічных навук, прафесар І.В. Саверчанка, акадэмік НАН Беларусі, намеснік дырэктара Цэнтра даследаванняў беларускай культуры, мовы і літаратуры НАН Беларусі, доктар філалагічных навук, прафесар А.А. Лукашанец, дырэктар Дзяржаўнага літаратурна-мемарыяльнага музея Якуба Коласа З.М. Камароўская, якія таксама зрабілі акцэнт на актуальнасці ідэі канферэнцыі, прысвечанай гістарычнай літаратуры, 75-годдзю з дня спалення Хатыні і 125-годдзю з дня нараджэння класіка нашай літаратуры Максіма Гарэцкага. З вялікай цікавасцю праслухалі прысутныя выступленне акадэміка, доктара геолага-мінералагічных навук, прафесара, заслужанага дзеяча навукі БССР Радзіма Гаўрылавіча Гарэцкага, пляменніка Максіма Гарэцкага.

Падчас працы інтэрактыўнага дыскурсу былі абмеркаваны шматлікія кірункі літаратуразнаўчай навукі, сярод якіх:

- Гістарычная тэматыка ў шматмоўнай літаратуры Беларусі і Беларускага Замежжа;
- Тэма Вялікай Айчыннай вайны ў беларускай літаратуры. Тэма спаленых вёсак.
- Аўтарскія мадэлі і стратэгіі ў беларускай гістарычнай літаратуры.
- Творчасць Максіма Гарэцкага ў сучаснай інфармацыйнай прасторы (культуралагічны, гістарычны, сацыялагічны, філасофскі, псіхалагічны, педагагічны і дыдактычна-метадычны аспекты) і інш.

Падчас канферэнцыі працавала тэматычная выстаўка "Падзвіжнік з малой Багацькаўкі", прысвечаная жыццю і творчасці Максіма Гарэцкага, арганізаваная бібліятэкарам Інстытута літаратуразнаўства імя Янкі Купалы М.У. Пінчук.

Даклады навуковай канферэнцыі ўзбагачаюць літаратуразнаўчую навуку многімі арыгінальнымі матэрыяламі, спрыяюць актуалізацыі духоўных каштоўнасцей, выпрацаваных народам у цяжкіх выпрабаваннях. Ідэйна-мастацкая значнасць творчай спадчыны мастакоў слова абумоўлівае яе значнасць у святле задач культурнага будаўніцтва ў Рэспубліцы Беларусь, умацавання духоўнасці беларускага народа на сучасным этапе.

Па выніках канферэнцыі будзе выдадзены зборнік навуковых матэрыялаў. Прадстаўленыя ў ім дасягненні даследаванняў могуць быць выкарыстаны як пры далейшых навуковых распрацоўках, так і ў навучальным працэсе, у першую чаргу на філалагічных факультэтах універсітэтаў Рэспублікі Беларусь.
.

Міжнародная навуковая канферэнцыя
"Францыск Скарына і яго час.
500-годдзе беларускага і ўсходнеславянскага кнігадрукавання"

адбылася 30 лістапада – 1 снежня 2017 года. Арганізатарамі выступілі Інстытут літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі і Міждзяржаўны фонд гуманітарнага супрацоўніцтва дзяржаў-удзельнікаў Садружнасці Незалежных Дзяржаў.

Францыск Скарына – вялікі беларускі першадрукар, выдатны асветнік і пісьменнік эпохі Адраджэння – унёс неацэнны ўклад у развіццё беларускай і ўсёй славянскай культуры. У 1517 годзе Ф. Скарына арганізаваў у Празе друкарню і выдаў там першую ва ўсходнеславянскім свеце друкаваную кнігу. На працягу 1517–1519 гг. ён пераклаў і апублікаваў 23 кнігі Бібліі. Пазней у Вільні асветнік выпусціў "Малую падарожную кніжку" (1522) і "Псалтыр" (1525).

На форуме было прадстаўлена больш чым 70 дакладаў вядомых беларускіх, расійскіх і ўкраінскіх навукоўцаў. Акрамя таго, у рабоце канферэнцыі прынялі ўдзел Уаліхан Каліжанаў, дырэктар Інстытута літаратуры і мастацтва імя М.А. Ауэзава Міністэрства адукацыі і навукі Рэспублікі Казахстан, доктар філалагічных навук; Агагусейн Шукюраў, вучоны сакратар Нацыянальнай акадэміі навук Азербайджана, кандыдат філалагічных навук. Прывітальныя словы прагучалі ад Старшыні Прэзідыума Нацыянальнай акадэміі навук Беларусі У.Р. Гусакова, выканаўчага дырэктара Міждзяржаўнага фонду гуманітарнага супрацоўніцтва дзяржаў-удзельніц СНД А.Г. Іксанава, Міністра культуры Рэспублікі Беларусь Ю.П. Бондара, Надзвычайнага і Паўнамоцнага Пасла Чэшскай Рэспублікі ў Рэспубліцы Беларусь Э. Мілана, Надзвычайнага і Паўнамоцнага Пасла Італьянскай Рэспублікі ў Рэспубліцы Беларусь С. Б'янкі, Надзвычайнага і Паўнамоцнага Пасла Рэспублікі Польшча ў Рэспубліцы Беларусь К. Паўліка і інш. Акрамя таго прагучалі прывітальныя адрасы да ўдзельнікаў канферэнцыі ад Інстытута літаратуры імя Т. Шаўчэнкі НАН Украіны, Ягелонскага ўніверсітэта, Полацкага райвыканкама.

На пленарным вынікі сваіх даследаванняў у галіне скарыназнаўства і сужнай тэматыцы прадставілі: дырэктар Інстытута літаратуразнаўства, доктар філалагічных навук, прафесар І. В. Саверчанка, прафесар кафедры тэорыі літаратуры філалагічнага факультэта Белдзяржуніверсітэта; доктар філалагічных навук В. П. Рагойша; член-карэспандэнт Міжнароднай акадэміі педагагічнай адукацыі, прафесар-метадыст Цэнтра педагагічнага майстэрства (Масква), доктар філалагічных навук, прафесар А. І. Фядотаў, прафесар кафедры ўкраінскага мовы і прыкладной лінгвістыкі Кіеўскага нацыянальнага універсітэта імя Тараса Шаўчэнкі, доктар філалагічных навук, прафесар А. І. Ніка і інш.

На секцыйных паседжаннях праблематыка канферэнцыі ахоплівала наступныя кірункі даследаванняў:

- пачатак і развіццё беларускага і ўсходнеславянскага кнігадрукавання;
- эпоха Рэнесанса – універсальная з'ява еўрапейскай культуры.
- пераклады Бібліі на нацыянальныя мовы;
- біблейскія пераклады: гісторыя і сучаснасць;
- роля нацыянальнай мовы ў развіцці культуры ва ўмовах глабалізацыі;
- Францыск Скарына і ўмацаванне нацыянальнай ідэнтычнасці.
- духоўная і матэрыяльная культура Беларусі XVI ст.;
- беларускае і ўсходнеславянскае мастацкае слова ў X – XVIII стст.

Многія даклады (у прыватнасці І.Ф. Штэйнера, Н. С. Гардзіенка, А. А. Рарыцкага і інш.) вылучаліся навізной і навуковай значнасцю як для беларускай гуманітарыстыкі, так і для ўсходнееўрапейскага літаратуразнаўчага дыскурсу ў цэлым. У дакладах І. М. Шаладонава, Ю. М. Лаўрыка, П. Р. Кошмана і многіх іншых прасочваецца канцэптуальнасць дзейнасці Ф. Скарыны для нацыянальнага развіцця народаў ВКЛ. Уплыў Ф. Cкарыны на культуру ХХ – пачатку ХХІ стст. таксама выразна быў раскрыты ў прадстаўленых удзельнікамі розных секцый матэрыялах.

Па выніках канферэнцыі будзе выдадзены зборнік навуковых матэрыялаў. Прадстаўленыя ў ім дасягненні даследаванняў могуць быць выкарыстаны як пры далейшых навуковых распрацоўках, так і ў навучальным працэсе, у першую чаргу на гуманітарных факультэтах універсітэтаў Рэспублікі Беларусь і суседніх краін.

Міжнародная навукова-практычная канферэнцыя
"Гісторыя беларускай літаратуры: стан і перспектывы даследавання
(да 135-годдзя з дня нараджэння Янкі Купалы і Якуба Коласа)"

адбылася 15–16 лістапада 2017 года ў Інстытуце літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі.

У рабоце форуму прынялі ўдзел каля 90 вядомых беларускіх, польскіх, расійскіх і ўкраінскіх навукоўцаў. Удзельнікаў канферэнцыі на ўрачыстым адкрыцці віталі акадэмік-сакратар Аддзялення гуманітарных навук і мастацтваў Нацыянальнай акадэміі навук Беларусі, член-карэспандэнт НАН Беларусі А. А. Каваленя, дырэктар Дзяржаўнага музея гісторыі беларускай літаратуры Д. Л. Яцкевіч, унучка Якуба Коласа В. Д. Міцкевіч і інш.

Народныя паэты Беларусі Янка Купала (1882–1942) і Якуб Колас (1882–1956) праз сінтэз шматвяковых нацыянальных мастацкіх традыцый з лепшымі ўзорамі сусветнай культуры ўзнялі тагачасную беларускую літаратуру на сусветны ўзровень, вярнулі яе ў еўрапейскі кантэкст. Творчыя здабыткі песняроў сталі знакавымі ідэйна-мастацкімі адкрыццямі і выдатнымі дасягненнямі беларускай паэзіі, прозы і драматургіі. Янка Купала і Якуб Колас стаяць ля вытокаў беларускага нацыянальнага адраджэння, станаўлення беларускай дзяржаўнасці і беларускай літаратурнай мовы. Іх творчасць – энцыклапедыя жыцця беларускага народа першай паловы ХХ стагоддзя.

Падчас працы пленарнага пасяджэння, 6 навуковых секцый і інтэрактыўнага дыскурсу былі абмеркаваны шматлікія кірункі літаратуразнаўчай навукі, сярод якіх:

- жыццёвыя і творчыя шляхі Янкі Купалы і Якуба Коласа;
- грамадская дзейнасць Янкі Купалы і Якуба Коласа;
- перакладчыцкая дзейнасць Янкі Купалы і Якуба Коласа;
- вывучэнне творчых здабыткаў Янкі Купалы і Якуба Коласа ў сярэдняй школе і ВНУ;
- спадчына Янкі Купалы і Якуба Коласа ў святле актуальных праблем літаратуразнаўства, мовазнаўства, тэксталогіі;
- рэпрэзентазентацыя твораў Янкі Купалы, Якуба Коласа, Максіма Багдановіча і іншых класікаў беларускай літаратуры ў гісторыі выдавецкай справы Беларусі і замежжа;
- галоўныя праблемы музейнага і архіўнага захавання спадчыны класікаў беларускай літаратуры;
- класічная беларуская літаратура ў сучасным прачытанні;
- рэцэпцыя творчасці класікаў беларускай літаратуры ў літаратурах народаў свету і інш.

У межах канферэнцыі былі прадстаўлены новыя выданні ў галіне коласазнаўства.

Даклады навуковай канферэнцыі ўзбагачаюць літаратуразнаўчую навуку многімі арыгінальнымі матэрыяламі, спрыяюць актуалізацыі духоўных каштоўнасцей, выпрацаваных народам у цяжкіх выпрабаваннях. Ідэйна-мастацкая значнасць творчай спадчыны мастакоў слова абумоўлівае яе значнасць у святле задач культурнага будаўніцтва ў Рэспубліцы Беларусь, умацавання духоўнасці беларускага народа на сучасным этапе.

Па выніках канферэнцыі будзе выдадзены зборнік навуковых матэрыялаў. Прадстаўленыя ў ім дасягненні даследаванняў могуць быць выкарыстаны як пры далейшых навуковых распрацоўках, так і ў навучальным працэсе, у першую чаргу на філалагічных факультэтах універсітэтаў Рэспублікі Беларусь.

Міжнародная навукова-практычная канферэнцыя
«Дзяржава, грамадства і царква ў гісторыі Беларусі
(да 500-годдзя выдання Францыскам Скарынам друкаванай Бібліі і 300-годдзя з дня нараджэння свяціцеля Георгія Каніскага, арцыбіскупа Магілёўскага)»

адбылася 12-13 кастрычніка 2017 г. у Мінскай духоўнай семінарыі ў Жыровічах і Інстытуце літаратуразнаўства (Жыровічы – Мінск). Канферэнцыя была прымеркавана да 500-годдзя беларускага кнігадрукавання і 300-годдзя з дня нараджэння Свяціцеля арцыбіскупа Магілёўскага Георгія Каніскага, выбітнага рэлігійнага дзеяча XVIII стагоддзя.

Удзел у ёй прынялі больш за 30 навукоўцаў. Адзначым замежных гасцей: Лиякумович Цімафей Барысавіч, доктар філалагічных навук, прафесар (ЗША), Мілошавіч Зоран, доктар сацыялагічных навук, прафесар, старшы навуковы супрацоўнік Інстытута палітычных даследаванняў (Бялград, Сербія).

Праблемнае поле канферэнцыі:

1. Гісторыя Праваслаўнай Царквы ў Беларусі, Расіі і Украіне
2. Духоўна-культурная спадчына ўсходнеславянскага свету
3. Царкоўна-дзяржаўныя адносіны на сучасным этапе
4. Царкоўна-грамадскія адносіны: асноўныя тэндэнцыі і шляхі развіцця
5. Царкоўная і свецкая навука ў гісторыі Беларусі
6. Духоўная і свецкая адукацыя: гісторыя і сучаснасць
7. Роля царкоўных мастацтваў у развіцці беларускіх культурных традыцый.

Галоўная мэта канферэнцыі – усебаковае асэнсаванне шляхоў гістарычнага, рэлігійнага і культурнага развіцця Беларусі і ўсходнеславянскіх дзяржаў.

Таксама былі прадстаўлены:

2-х томнае выданне «ПОЛОЦКИЕ ГРАМОТЫ XIII – НАЧАЛА XVI В.» (Груша Аляксандр Іванавіч, дырэктар Цэнтральнай навуковай бібліятэкі імя Я. Коласа НАН Беларусі);

«Слова и речи Георгия Конисского, архиепископа Могилевского» (Сомаў Сяргей Эдуардавіч, загадчык кафедры літаратуры і міжкультурных камунікацый Магілёўскага дзяржаўнага ўніверсітэта ім. А.А. Куляшова; Цяплова Валянціна Анатольеўна, прафесар Мінскай духоўнай акадэміі, дацэнт Беларускага дзяржаўнага універсітэта).

Міжнародная навукова-практычная канферэнцыя
"Беларуская літаратура ў культурнай прасторы сучаснага свету:
Да 120-годдзя з дня нараджэння Кандрата Крапівы"

адбылася 3–4 сакавіка 2016 г. у філіяле "Інстытут літаратуразнаўства імя Янкі Купалы" ДНУ "Цэнтр даследаванняў беларускай культуры, мовы і літаратуры НАН Беларусі".

У ёй прынялі ўдзел больш чым 100 навукоўцаў, у тым ліку з Украіны – 7, з Польшчы – 3, з ЗША – 1.

Па выніках працы канферэнцыі быў выдадзены зборнік матэрыялаў "Беларуская літаратура ў культурнай прасторы сучаснага грамадства: матэрыялы Міжнароднай навуковай канферэнцыі да 120-годдзя з дня нараджэння Кандрата Крапівы (Мінск, 3-4 сакавіка 2016 г.) / Цэнтр даследаванняў бел. культуры, мовы і літ. Нац. акадэміі навук Беларусі. Мінск: Права і эканоміка, 2016".

Асноўныя праблемы, вынесеныя на абмеркаванне:

- Праблема пісьменніцкага майстэрства ў творах сучасных аўтараў;
- Беларуская літаратурная класіка ў новым прачытанні;
- Вялікая Айчынная вайна ў жыцці і творчасці пісьменнікаў;
- Кандрат Крапіва і жанрава-стылёвыя пошукі беларускай літаратуры ХХ і ХХІ стагоддзя;
- Творчасць Кандрата Крапівы ў сучаснай інфармацыйнай прасторы (культуралагічны, гістарычны, сацыялагічны, філасофскі, псіхалагічны, педагагічны і дыдактычна-метадычны аспекты);
- Навуковая і грамадская дзейнасць акадэміка К.К. Атраховіча (Кандрата Крапівы) і яго атачэнне;
- Кандрат Крапіва і актуальныя праблемы мовазнаўства.

Народны пісьменнік Беларусі, акадэмік НАН Беларусі, заслужаны дзеяч навукі Беларусі, лаўрэат Дзяржаўных прэмій СССР і БССР, доктар філалагічных навук – Кандрат Крапіва (К.К. Атраховіч) (1896 – 1991 гг.) увайшоў у гісторыю беларускай літаратуры як стваральнік высокамастацкіх драматургічных, паэтычных і празаічных твораў, навуковых даследаванняў аб беларускай літаратуры і культуры.

Даклады навуковай канферэнцыі ўзбагачаюць літаратуразнаўчую навуку многімі арыгінальнымі матэрыяламі, спрыяюць актуалізацыі духоўных каштоўнасцей, выпрацаваных народам у цяжкіх выпрабаваннях. Ідэйна-мастацкая значнасць творчай спадчыны Кандрата Крапівы абумоўлівае яе значнасць у святле задач культурнага будаўніцтва ў Рэспубліцы Беларусь, умацавання духоўнасці беларускага народа на сучасным этапе.